Almennar upplýsingar um Getraunadeildina

Getraunadeildin er nýr leikur sem byggir á gamla Hópleik Íslenskra getrauna sem hefur verið í gangi nokkur undanfarin ár. Allir sem voru skráðir í Hópleik eru sjálfkrafa skráðir í Getraunadeildina. Í Getraunadeildinni gefst tippurum tækifæri til að spreyta sig gegn öðrum tippurum á Íslandi án aukakostnaðar. Í Getraunadeildinni gildir betra skor úr enska seðlinum eða sunnudagsseðlinum. Fáir þú 9 rétta á enska og 10 rétta á Sunnudagsseðilinn færð þú 10 í skor. Þeir sem lenda í þrem efstu sætunum í hverri deild fá veglega vinninga. Alls verða um tvær milljónir greiddar í vinninga á árinu 2009.

Skráning

Þátttaka í leiknum er afar einföld og kostar ekkert aukalega. Hægt er að fylgjast með stöðu síns liðs hér á síðunni.

  Ef þú ert ekki þegar skráður (í gamla hópleiknum).

Í valmyndinni sem kemur upp ákveður þú hvaða félag þú vilt styrkja. Ef þú veist ekki félagsnúmerið smellir þú á Lista yfir félög og þá færð þú upp nöfn og félagsnúmer íþróttafélaganna á Íslandi. 22% af upphæðinni sem þú tippar fyrir rennur beint til félagsins sem þú velur að styrkja.

Þú velur nafn á liðið og skráir svo inn umbeðnar upplýsingar og smellir á Áfram.

Þá færð þú upp valmynd sem sýnir þér laus liðsnúmer hjá félaginu. Þú getur valið eitt af þeim númerum og þá verður það númerið á þínu liði. Þú staðfestir neðst á síðunni og lokar glugganum.

Til að ljúka skráningunni þarft þú að fara í innskráningu  og smella á „uppfæra félags og hópupplýsingar“  og setur inn liðsnúmerið þitt í þar til gerðan dálk.  

Þegar þú tippar í getraunum eftir þetta á netinu, skráist vinningafjöldinn sem þú færð, sjálfkrafa í Getraunadeildina undir nafninu sem þú valdir.  

Þegar þú tippar í sölukassa verður þú að merkja við númer íþróttafélagsins sem þú ætlar að styrkja og einnig númer þíns liðs ætlir þú að taka þátt í Getraunadeildinni. Það er gert með því að strika yfir tölurnar á getraunaseðlinum.

Hægt er að fylgjast með árangri síns liðs hér á síðunni með því að smella á 1.deild, 2.deild og 3.deild

Deildaskipting

Keppni í Getraunadeild er skipt upp í þrjár deildir og er það gert til þess að þeir sem kaupa fáar raðir geti keppt á jafnréttisgrundvelli við tippara í svipaðri stöðu.  Þeir sem kaupa margar raðir gera þá slíkt hið sama.

 Reglan um skiptingu raða í deildir er eftirfarandi:

Fyrstu 162 raðirnar fara í 3 deild, 2 deild og 1 deild

Raðir umfram 162 upp að 676 röðum fara aðeins í 2. deild og 1 deild

Raðir umfram 676 raðir upp að 1.653 röðum fara aðeins í 1 deild.

Raðir umfram 1.653 raðir taka ekki þátt í Getraunadeildinni.

Þetta skýrir hvers vegna sama liðið getur verið ofarlega í öllum deildum og hvers vegna sama liðið getur fengið 9 rétta í 3 deild en 10 rétta í 2 deild. Þá hefur röðin sem var með 10 rétta verið t.d. í sæti 200, þ.e. umfram 162 fyrstu raðirnar sem fara í 3 deild.

Tölurnar 11/10 þýða að hópurinn hefur fengið 11 rétta í enska boltanum, en 10 rétta í Evrópuboltanum (sunnudagsseðlinum) Hærri talan gildir þegar staðan er reiknuð í hópleiknum hverju sinni. Gangi illa í Enska boltanum gefst tippurum tækifæri til að ná sér á strik í Evrópuboltanum á sunnudögum. Úrslit í Miðvikudagsseðlinum gilda ekki í Getraunadeildinni.

Keppnisfyrirkomulag

Keppni í Getraunadeildinni stendur yfir í 10 vikur í senn og eru því 5 deildakeppnir á hverju ári og frí í tvær vikur.  Gildir besta skor 8 vikna og þurkast því slökustu tvær vikurnar út þegar lokastaðan er reiknuð.  Verði lið jöfn í einhverju af þrem efstu sætunum fer fram bráðabani næstu helgi eða helgar þar til úrslit fást.

Innsendar raðir

Það skiptir máli hvernig raðirnar eru sendar inn til Íslenskra getrauna.

Raðir sem einstaklingar kaupa í gegnum tölvu eða sölukerfi félaganna koma inn í Getraunadeildina fyrst.

Raðir sem einstaklingar kaupa í sölukössum koma inn þar á eftir.

Raðir sem keyptar eru í áskrift koma inn síðastar.

Vinningar:

Veittir eru glæsilegir ferðavinningar fyrir efstu þrjú sætin í hverri deild

Í 1 deild eru verðlaunin 60.000 kr ferðavinningur fyrir 1.sætið, 50.000 fyrir 2.sæti og 40.000 kr. fyrir 3.sæti

Í 2.deild eru verðlaunin 50.000 kr. ferðavinningur fyrir 1.sætið, 40.000 kr. fyrir 2.sæti og 30.000 kr. fyrir 3.sæti

Í 3. deild eru verðlaunin 40.000 kr. ferðavinningur fyrir 1.sætið, 30.000 kr. fyrir 2.sæti og 20.000 kr. fyrir 3.sæti.

Auk þessa fá þau lið sem lenda í þrem efstu sætunum í hverri deild í fyrstu fjórum deildakeppnunum á árinu, alls 12 lið að hámarki í hverri deild,  tækifæri til að keppa um Íslandsmeistaratitilinn. Þar eru fyrstu verðlaun 100.000 kr. ferðavinningur.